سعودی عرب میں بس حادثے میں خواتین سمیت 5 پاکستانی عمرہ زائرین جاں بحق اور متعدد زخمی ہوگئے۔ سعودی امدادی ٹیموں نے لاشوں اور زخمیوں کو قریبی اسپتالوں میں منتقل کردیا۔
پاکستان سے عمرہ زائرین کو لے جانے والی بس بدر سے مدینہ جاتے ہوئے حادثے کا شکار ہوگئی جس کے نتیجے میں پاکستان سے تعلق رکھنے والی تین خواتین سمیت پانچ افراد جاں بحق ہوگئے۔ حادثے میں بچوں اور بوڑھوں سمیت متعدد مرد و خواتین زخمی ہو گئے۔
ذرائع کے مطابق جاں بحق ہونے والے خواتین اور مردوں کا تعلق پاکستان کے ضلع بہاولنگر سے ہے۔ جاں بحق ہونے والی خواتین میں سے دو کا تعلق ضلع بہاولنگر کے گاؤں 228 9R سے ہے اور تیسری خاتون کا تعلق بہاولنگر کے نواحی گاؤں 201 مراد سے ہے۔
مردوں میں سے ایک بزرگ کا تعلق گاؤں 39 3R سے ہے اور دوسرے بزرگ کا تعلق ڈاہرنوالہ شہر سے بتایا جاتا ہے۔سعودی امدادی ٹیموں نے تمام لاشوں اور زخمیوں کو قریبی اسپتالوں میں منتقل کردیا ہے جہاں زخمیوں کو بہترین طبی سہولیات فراہم کی جارہی ہیں۔
