شعبان المعظم کا چاند نظر آگیا، پاکستان میں شب برات 2025 کی تاریخ کا اعلان کر دیا گیا۔ شعبان 1446ھ کا چاند دیکھنے کے لیے مرکزی رویت ہلال کمیٹی کا اجلاس اسلام آباد میں ہوا۔ ملک کے مختلف حصوں سے چاند نظر آنے کی اطلاعات موصول ہوئیں۔
پاکستان میں شعبان کا چاند دیکھنے کے لیے رویت ہلال کمیٹی کا اجلاس جمعرات کو اسلام آباد میں ہوا۔ اجلاس کی صدارت مرکزی رویت ہلال کمیٹی پاکستان کے چیئرمین مولانا سید محمد عبدالخبیر آزاد نے کی۔ زونل کمیٹیوں کے اجلاس بھی ان کے متعلقہ ہیڈ کوارٹرز لاہور، کراچی، کوئٹہ اور پشاور میں منعقد ہوئے۔
ملک کے مختلف حصوں سے چاند نظر آنے کے بعد چیئرمین رویت ہلال کمیٹی مولانا سید محمد عبدالخبیر آزاد نے اعلان کیا کہ یکم شعبان 1446 ہجری 31 جنوری بروز جمعہ جبکہ شب برات 13 فروری 2025 بروز جمعرات کو ہوگی۔
اس سے قبل جاپان دنیا کا پہلا ملک تھا جس نے ماہ شعبان 1446 ہجری کے آغاز کی تاریخ کا اعلان کیا تھا۔ جاپان کی رویت ہلال کمیٹی نے ماہ شعبان کی رویت کے حوالے سے اعلان کیا ہے کہ ملک میں شعبان 1446 ہجری کا مہینہ 31 جنوری بروز جمعہ شروع ہوگا۔ واضح رہے کہ ماہرین فلکیات کی پیشین گوئیوں کے مطابق ماہ شعبان کے چاند کی پیدائش گزشتہ روز ہوئی تھی۔
ماہرین فلکیات نے رمضان المبارک کے آغاز کے حوالے سے بھی اہم پیش گوئیاں کی ہیں۔ اس سال رمضان المبارک کا آغاز مارچ میں ہوگا۔ کچھ ممالک میں یہ یکم مارچ اور دیگر میں 2 مارچ سے شروع ہوگا۔ سعودی عرب اور خلیجی ممالک سمیت کئی مغربی اور یورپی ممالک میں یکم مارچ بروز ہفتہ کو پہلا رمضان شروع ہوگا۔
عید الفطر 30 مارچ بروز اتوار یا 31 مارچ بروز پیر کو ہونے کا امکان ہے۔ دریں اثناء پاکستان میں 2025 میں عید الفطر کی متوقع تاریخ بھی سامنے آ گئی ہے۔ ماہرین فلکیات کے مطابق پاکستان میں عیدالفطر کا چاند 29 یا 30 مارچ کو نظر آنے کا امکان ہے.
اس طرح عیدالفطر 30 یا 31 مارچ کو منائی جائے گی۔رمضان المبارک کی رویت کا حتمی اعلان اور پاکستان میں عید کا چاند رویت ہلال کمیٹی کرے گی۔
