Category: موسم

لاہور: پنجاب ڈیزاسٹر مینجمنٹ اتھارٹی (پی ڈی ایم اے) نے خبردار کیا ہے کہ آنے والے دنوں میں ملک کے مختلف حصوں میں گرمی کی شدت میں مزید اضافہ ہوگا، 13 جون تک درجہ حرارت 7 ڈگری سینٹی گریڈ تک بڑھنے کا امکان ہے۔

پی ڈی ایم اے کے مطابق بہاولپور، رحیم یار خان، ڈیرہ غازی خان، اور ملتان میں گرمی کی لہر کی شدت میں مزید اضافے کا امکان ہے جب کہ لاہور سمیت پنجاب بھر میں گرمی کی شدید لہر 13 جون تک جاری رہنے کا امکان ہے۔

شدید گرمی سے متاثرہ شہروں میں درجہ حرارت کی تفصیلات کچھ یوں ہیں کہ بھکر اور ڈیرہ اسماعیل خان میں 50° بنوں، سرگودھا، نور پور تھل، سبی میں 49° جبکہ ڈی جی خان، گوجرانوالہ، حافظ آباد، جیکب آباد، منڈی بہاؤالدین میں 48° اور لاہور، ملتان، فیصل آباد، سیالکوٹ، شیخوپورہ، دادو میں 47° تاہم اسلام آباد، پشاور، بہاولپور، نواب شاہ 46° تک درجہ حرارت محسوس کیا جائےگا۔

محکمہ موسمیات کے مطابق 11 اور 12 جون کے دوران بالائی علاقوں میں درجہ حرارت معمول سے 5 سے 7 ڈگری اور جنوبی علاقوں میں معمول سے 4 سے 6 ڈگری زیادہ رہنے کا امکان ہے۔

پی ڈی ایم اے نے شہریوں کو سختی سے ہدایت کی ہے کہ وہ خود کو ہیٹ ویو سے بچانے کے لیے سورج کی غیر ضروری نمائش سے گریز کریں۔ پی ڈی ایم اے نے ہسپتالوں اور ریسکیو اداروں کو الرٹ کر دیا ہے تاکہ کسی بھی ہنگامی صورتحال میں فوری مدد فراہم کی جا سکے۔

پانی اور مشروبات وافر مقدار میں پئیں، اپنے سر کو دھوپ سے بچائیں (ٹوپی، اسکارف یا چھتری کا استعمال کریں)، اور بوڑھوں، بچوں اور بیمار لوگوں کا خاص خیال رکھیں۔ اس کے علاوہ، اگر آپ کو ہیٹ اسٹروک کی علامات کا سامنا ہو تو فوری طور پر طبی امداد حاصل کریں۔

مغربی ہواؤں کا سسٹم 28 مئی کو بالائی علاقوں میں داخل ہونے کا امکان ہے۔ سسٹم کے زیر اثر کشمیر، گلگت بلتستان، اسلام آباد، راولپنڈی، مری، گلیات، اٹک، چکوال اور جہلم میں بارش کا امکان ہے۔

میانوالی، سرگودھا، حافظ آباد، منڈی بہاءالدین، سیالکوٹ، نارووال، اوکاڑہ، لاہور، فیصل آباد، جھنگ اور ٹوبہ ٹیک سنگھ میں بھی بارش کا امکان ہے۔ گوجرانوالہ، گجرات، شیخوپورہ، چترال، دیر، سوات، مالاکنڈ، مانسہرہ، بٹگرام، شانگلہ اور کوہستان میں گرج چمک کے ساتھ بارش کا امکان ہے۔

ایبٹ آباد، ہری پور، پشاور، مردان، صوابی، نوشہرہ، مہمند، خیبر، اورکزئی، کرم، بنوں، لکی مروت، کوہاٹ، کرک اور وزیرستان میں بھی بارش کی پیشگوئی کی گئی ہے۔ 27 مئی سے 31 مئی کی شام یا رات تک وقفے وقفے سے بارش کا امکان ہے۔

ژوب، زیارت، بارکھان، ڈی جی میں بھی ہلکی بارش متوقع ہے۔ ژوب، زیارت، بارکھان، ڈی جی خان، راجن پور، ملتان، بھکر، لیہ، بہاولپور، ساہیوال، پاکپتن، وہاڑی اور ڈی جے خان میں بھی ہلکی بارش متوقع ہے۔ ان علاقوں میں 27 سے 30 مئی تک بارش اور ہوا کا سلسلہ جاری رہے گا۔

گرج چمک، آندھی اور ژالہ باری سے کمزور انفراسٹرکچر کو نقصان پہنچنے کا امکان ہے۔ بجلی کے کھمبے، درخت، گاڑیاں اور سولر پینلز کو نقصان پہنچ سکتا ہے۔ کاشتکار موسمی حالات کے مطابق فصلوں سے متعلق سرگرمیوں کا اہتمام کریں۔

مسافروں اور سیاحوں کو احتیاطی تدابیر اختیار کرنے کا مشورہ دیا جاتا ہے۔ تمام متعلقہ اداروں کو الرٹ رہنے اور بروقت اقدامات کرنے کی ہدایت کی گئی ہے۔

لاہور سمیت پنجاب بھر میں گرمی کی شدت میں اضافہ ہوگیا ہے۔ محکمہ موسمیات نے صوبے بھر میں آئندہ 4 روز تک ہیٹ ویو جاری رہنے کی پیش گوئی کی ہے۔

محکمہ موسمیات کے مطابق آج لاہور میں زیادہ سے زیادہ درجہ حرارت 43 ڈگری سینٹی گریڈ ریکارڈ کیا گیا۔ بہاولنگر، رحیم یار خان، بھکر اور کوٹ ادو میں درجہ حرارت 45 سے 47 ڈگری سینٹی گریڈ تک پہنچ گیا۔ اس کے علاوہ ٹوبہ ٹیک سنگھ، سرگودھا، ساہیوال، اوکاڑہ، ملتان، منڈی بہاؤالدین، خانیوال، قصور اور فیصل آباد میں درجہ حرارت 42 سے 43 ڈگری سینٹی گریڈ ریکارڈ کیا گیا۔

محکمہ موسمیات نے آئندہ چار روز کے دوران صوبے بھر میں درجہ حرارت میں مزید تین سے چار ڈگری سینٹی گریڈ تک اضافے کی پیشگوئی کی ہے۔ طبی ماہرین نے ہیٹ ویو کے دوران غیر ضروری طور پر گھروں سے نہ نکلنے اور بچوں، بوڑھوں اور بیماروں کے لیے خصوصی احتیاطی تدابیر اختیار کرنے کا مشورہ دیا ہے۔

پنجاب ڈیزاسٹر مینجمنٹ اتھارٹی (پی ڈی ایم اے) نے تمام متعلقہ اداروں کو شدید گرمی کی لہر کے پیش نظر الرٹ رہنے اور صوبے کے تمام ہسپتالوں میں ہیٹ ویو کاؤنٹرز قائم کرنے کی بھی ہدایت کی ہے۔

تاہم محکمہ موسمیات نے 19 مئی سے پاکستان میں مغربی ہواؤں کے داخل ہونے کے بعد دو روز تک درجہ حرارت اور بارش میں کمی کی پیش گوئی بھی کی ہے۔

محکمہ موسمیات کے مطابق آئندہ 24 گھنٹوں کے دوران ملک کے بیشتر علاقوں میں موسم گرم اور خشک رہنے کا امکان ہے۔ تاہم خیبرپختونخوا، بالائی پنجاب، اسلام آباد، شمال مشرقی بلوچستان، کشمیر اور گلگت بلتستان میں موسم جزوی طور پر ابر آلود رہے گا۔

پنجاب میں راولپنڈی، اٹک، چکوال، جہلم، تلہ گنگ اور میانوالی میں بھی بارش کا امکان ہے۔ حافظ آباد، گوجرانوالہ، منڈی بہاؤالدین، گجرات اور سیالکوٹ میں بھی مطلع ابر آلود رہے گا۔ اس کے علاوہ نارووال، لاہور، شیخوپورہ اور فیصل آباد میں بھی بارش اور ژالہ باری کا امکان ہے۔ مری، گلیات اور گردونواح میں گرج چمک کے ساتھ بارش کا امکان ہے۔

محکمہ موسمیات نے پیش گوئی کی ہے کہ خیبرپختونخوا، بالائی پنجاب اور شمال مشرقی بلوچستان میں بارش کا امکان ہے جب کہ آج رات اسلام آباد میں چند مقامات پر تیز ہواؤں کے ساتھ بارش کا امکان ہے۔ اسی طرح خیبرپختونخوا اور خطہ پوٹھوہار میں بھی چند مقامات پر ژالہ باری کا امکان ہے۔

بلوچستان کے اضلاع ژوب، موسیٰ خیل، بارکھان، قلعہ سیف اللہ اور قلات میں بارش کا امکان ہے۔ جبکہ خضدار اور گردونواح میں تیز ہواؤں اور گرج چمک کے ساتھ بارش کا امکان ہے۔

گلگت بلتستان اور آزاد کشمیر کے مختلف علاقوں میں تیز ہواؤں اور گرج چمک کے ساتھ بارش ہو سکتی ہے جبکہ سندھ کے بیشتر اضلاع میں موسم شدید گرم اور خشک رہے گا۔