Pakistani cricketers wives

پاکستانی کھلاڑیوں کی بیگمات اسٹیڈیم میں توجہ کامرکز

ٹی 20ورلڈ کپ 2021 میں بھارت اورنیوزی لینڈ کیخلاف گرین شرٹس کی غیرمعمولی کارکردگی سوشل میڈیا پرچھائی ہوئی ہے، جہاں میچز کے سنسنی خیزلمحات اور ٹیموں کی کارکردگی زیربحث ہے وہیں اسٹیڈیم میں موجود پاکستانی کھلاڑیوں کی بیگمات کی تصاویربھی خوب توجہ حاصل کررہی ہیں۔

پاکستانی ٹیم آل راؤنڈرشعیب ملک کی اہلیہ اوربھارتی ٹینس اسٹار ثانیہ مرزا نے اعلان کیا تھا کہ جس دن بھارت اور پاکستان پچ پر ایک دوسرے کے مدمقابل آئیں گے اس دن وہ سوشل میڈیا سے غائب ہوجائیں گی۔ یہ فیصلہ کرنے والی ثانیہ کے پیش نظرروایتی حریفوں کے کھیل کوآن لائن جنگ میں بدلنے والوں کی پھیلائی جانے والی نفرت اورمنفی تبصروں سے بچنا تھا۔

شاید اسی وجہ سے ثانیہ سوشل میڈیا پراپنی تصاویرشیئرنہیں کررہیں لیکن پاکستان اورنیوزی لینڈ کیخلاف میچ کے دوران شعیب کی سپورٹ کیلئے گیلری میں موجود تھیں۔ پاکستان کی پسندیدہ بھابھی کی دیگرکھلاڑیوں کی بیگمات کے ساتھ خوشگوارموڈ میں تصاویرسوشل میڈیا پروائرل ہیں۔

کیویز کیخلاف میچ میں ثانیہ کو حسن علی کی اہلیہ سامعہ، محمد حفیظ کی اہلیہ نازیہ اورعماد وسیم کی اہلیہ ثانیہ اشفاق کے ساتھ دیکھا گیا۔

ان تصاویرمیں سب کے بچوں کوبھی دیکھا جاسکتا ہے۔

اس سے قبل ثانیہ نے انسٹااسٹوریزمیں بھی نازیہ حفیظ کی سالگرہ پران کے اور سامعہ کے ہمراہ تصویرشیئرکی تھی۔

قومی ٹیم کے کھلاڑی محمد حفیظ نے بھی اپنی ٹویٹ میں ثانیہ کو ‘مددگار فرشتہ’ قراردیتے ہوئے بتایا تھا کہ وہ اہلیہ کی سالگرہ کا اہم موقع بھول گئے تھے لیکن عین وقت پر ثانیہ مرزا نے کیک کا انتظام کرنے میں مدد کی. شعیب اور ثانیہ کی شادی 2010 میں ہوئی تھی، اس جوڑی کا ایک بیٹا اذہان مرزا ملک ہے جس کی پیدائش 30 اکتوبر2018 کوبھارتی شہرحیدرآباد میں ہوئی۔

اپنا تبصرہ بھیجیں