shan e rehmat

ضلع کونسل ہال میں میونسپل کمیٹی کے زیر اہتمام محفل نعت کا انعقاد کیا گیا، صوبائی وزیر کی شرکت

صوبائی وزیر برائے وزیراعلیٰ معائنہ ٹیم محمد اجمل چیمہ نے کہا ہے کہ اسوہ حسنہ ﷺ ہمارے لئے مشعل راہ ہے، وزیراعظم پاکستان اوروزیر اعلیٰ پنجاب کی جانب سے رحمت اللعالمین اتھارٹی قائم کرنے کا بنیادی مقصد اپنی آنے والی نسلوں کو سیرت النبی سے روشناس کرانا ہے تا کہ ریاست مدینہ کی تخلیق کو عملی جامہ پہنایا جا سکے۔ یہ اتھارٹی نا صرف سکولوں کے نصاب بلکہ سوشل میڈیا پر نازیبا مواد کی نگرانی کرے گی بلکہ ہم اس کے ذریعے سے سیرت النبی بچوں اور بڑوں کو پڑھانے کا طریقہ کار بھی طے کریں گے۔

منڈی بہاﺅالدین ( ایم.بی.ڈین نیوز 11 اکتوبر 2021 ) ان خیالات کا اظہار انہوں نے یہاں ڈی سی آفس میں میڈیا بریفنگ اور جشن رحمت اللعالمین کے حوالے سے محفل نعت کے بطور مہمان خصوصی شرکت کرتے ہوئے کیا ۔ اس موقع پر ڈپٹی کمشنر طارق علی بسرا، ایڈیشنل ڈپٹی کمشنر جنرل محمد شفیق، اسسٹنٹ کمشنر منڈی بہاءالدین امتیاز علی بیگ ،سی او میونسپل کمیٹی انتظار چیمہ، سرکاری افسران و ملازمین کے علاوہ نامور نعت خوان نے بھی شرکت کی۔

قبل ازیں ضلع کونسل ہال میں میونسپل کمیٹی کے زیر اہتمام محفل نعت کا انعقاد کیا گیا تھا ۔ محفل نعت میں معروف نعت خوانوں اور شعراء کرام نے نبی کریم ﷺکی شان اقدس میں نعت کی شکل میں گلہائے عقیدت پیش کئے جن کا واضح مفہوم یہ تھا کہ حضور اکرم ﷺ کی ذات ہمارے لئے عظیم نعمت ہے۔ محبت رسول ایما ن کا لازمی جزو ہے اور سرکار دو عالم ﷺ کا عشق ہی مومن کا حقیقی سرمایہ ہے اور آپ کی سچی محبت تمام جہانوں میں کامیابی کی ضامن ہے۔

اس موقع پر صوبائی وزیر محمد اجمل چیمہ نے کہا کہ حضور اکرم ﷺ کی بعثت بھٹکی ہوئی انسانیت کو سیدھی راہ دکھانے کیلئے ہوئی، آپ ﷺ کی آمد سے ظلمات کے اندھیرے چھٹ گئے ، آپ نے رنگ و نسل کی تمیز اور برابری کا معیار ختم کر کے معاشرے میں عدل و انصاف کو رواج دیا جس سے ایک فلاحی معاشرے کا قیام ممکن ہو سکا۔ انہوں نے کہا کہ نبی کریم ﷺ سے محبت کا تقاضا ہے کہ ہم سیرت مبارکہ پر صدق دل سے عمل پیرا ہو کر آپس میں اتحاد و اتفاق اور رواداری کی فضا قائم رکھیں ۔ انہوں نے انہوں نے نعتیہ اشعار پیش کرنے والے شعراء کو خراج تحسین پیش کرتے ہوئے کہا کہ عشرہ شان رحمت اللعالمین منا کر دنیا پر واضح کر دیا ہے کہ ہم عشق رسول ﷺ سے لبریز ہیں اور آپ ﷺ کی شان میں گستاخی کسی قیمت پر برداشت نہیں کر سکتے۔

اپنا تبصرہ بھیجیں