آئی جی جیل خانہ جات کی طرف سےمنڈی بہاوالدین پولیس ملازمین میں کیش ایوارڈ تقسیم

فرائض منصبی پوری ایمانداری اور جانفشانی سے سر انجام دینے والے ملازمین انعامات اور جلد ترقیوں کے زیادہ مستحق ہوتے ہیں،ایسے ملازمین جو کم وسائل کے باوجود بہترین کارکردگی دکھا رہے ہیں وہ محکمے اور اپنے افسران کی نظروں میں نمایاں مقام حاصل کر لیتے ہیں۔

منڈی بہاﺅالدین( ایم.بی.ڈین نیوز 23 جون2021 ) ان خیالات کا اظہا ر سپرنٹنڈنٹ جیل وحید خان نے انسپکٹر جنرل جیل خانہ جات پنجاب شاہد سلیم بیگ کی جانب سے ملازمین کیلئے فراہم کردہ نقد کیش تقسیم انعامات کی تقریب سے خطاب کرتے ہوئے کیا۔ تقریب میں ڈپٹی سپرنٹنڈنٹ جیل رانا شمشاد حسین،محمد معصب بلال گوندل، اسسٹنٹ سپرنٹنڈنٹ جیل عامر مچرا، سمیع اللہ گوندل، محمد وسیم ، محمد ثاقب رضا اور دیگر جیل سٹاف بھی موجود تھا۔

سپرنٹنڈنٹ جیل وحید خان نے کہا کہ جو سرکاری ملازمین اپنے فرائض منصبی کو پوری ایمانداری سے سر انجام دیتے ہیں وہ کامیابی کی منزلیں آسانی سے طے کرتے ہوئے جلد ترقیاں حاصل کر لیتے ہیں ۔انہوں نے ملازمین کو زور دیتے ہوئے کہا کہ اپنی پیشہ وارانہ صلاحیتوں کو دور جدید کے تقاضوں سے ہم آہنگ کرتے ہوئے کام پر زیادہ سے زیادہ توجہ دیں اور محکمے کی ترقی میں اپنا فعال اور مثبت کردار ادا کریں ۔

بعد ازاں انہوں نے آئی جی جیل خانہ جات پنجاب کی طرف سے مختص کئے گئے کیش ایوارڈ کو 197 ملازمین میں تقسیم کیا ۔ جس پر ملازمین آئی جی جیل خانہ جات پنجاب اور سپرنٹنڈنٹ جیل کا شکریہ ادا کیا اور اپنے اس عزم کا اعادہ کیا کہ وہ آئندہ بھی محنت ، لگن اور جانفشانی سے اپنے فرائض سر انجام دیں گے اور اپنے محکمے کا نام روشن کریں گے ۔

اپنا تبصرہ بھیجیں